Uri Sele, Pantun Kedang, Lembata

URI SELE (PANTUN KEDANG

Pantai Wata Ana', Desa Mahal 1,

Uyelewun kaya' tene

Dorong dope' ote ne ne

Ular naga ara bora

Ahin tutuq kara dora'

Pan mo ebeng bale bora'

Api kilo' ote ili

Aapi kilo' ale sue

Nulur mui kara kue'

Padu eera ole wata

Padu eera natan-natan

Adung puhu roing ata'

Uben bute ara nulur

Nulur ui eten one

Lun ko keti' bete do' ne

Oaq elu' e’a naun

Eluq sape moan sue

Kelen rehi me tebe' ue'

Nerung erung di’en oha' pana oha' mi’er

Noq nape te hara' rupa

Tubun i tara upal-upal

Noreq boreq sareq kata tutu' kata kare'

Ele nape te aadan mawu

Tawun ii tara mawu-mawu

Are' weri' buya' tepa

Ael se apo' nape repa'

Ude' kael ude' koro'

Bote' leu sora' orong

Are' weri' Watang wala

Lamang tara suya paya

Pan o doa lae' ko bale

Tema pohing teq ine ame

Ebe tibo' Lodo Laleng

Ero' kara o urang laleng

Pan doa di lae' ko bale

Tema wating te' huna hale

Tua'mado lala wutu'

Dei rei' teti tutu'

Tutu' puli panang ana'

Ebeng tara ana'-ana'

Are' keti' alu malan

Laleng mo' sobe engar laen

One'  aha' laleng ko ae

Pua' be ko'o huna laleng

Ero' ebe muda baran

Uha riwong namo anen balan

Ata aha' hoing nai'

Nape bale te bongan wati'

Ero' ari' sita sayang

Mara ko'o laleng suya paya

Ake sape bihar bahe

Bale wue mal di nau saya

Ero' tata o kara polor

Mara mo' laleng olor-olor

Doa bale dehiq di bale

Tau' bui' ko' laleng lae

Awu' batu' ero nebo'

Hune' tubar mara ebo

Ebo toi tua lahar

Tokong nape ledo dahang